दहिवडी : ता.२५
दहिवडी येथे गोंदवले रोडनजीक चैतन्य पाणपोईच्या पुढील बाजूस असलेल्या लग्न समारंभासाठी सजवून आणलेल्या चारचाकी गाडीने अचानक पेट घेतला. यामध्ये सुदैवाने कोणतीही जीवितहानी झाली नसून गाडी ७० टक्के पेटल्याने मोठी वित्तहानी झाली.
घटनास्थळावरुन मिळालेल्या स्थानिक माहितीनुसार, चव्हाण -जाधव परिवाराच्या विवाह सोहळ्यासाठी शिंदी बु।येथुन नवरदेव घेऊन आलेली एर्टीगा क्रमांक एम. एच. ११ डी.ए.४६१८ ही गाडी लग्न ठिकाणाहून सुमारे १००ते १५० मीटर अंतरावर उभी होती. लग्नापूर्वी नवरदेव देवदर्शन करून आल्यानंतर गाडी बाजूला उभी केली गेली. गाडीत असणारे सर्व लोक उतरल्यानंतर गाडीने अचानकच पेट घेतला. स्थानिक लोक आणि युवकांनी धावपळ करत बादल्या भरून आणत पाणी ओतून आग विझवण्याचा प्रयत्न केला. त्याचबरोबर शेजारी असणाऱ्या डाळिंबाच्या बागेतील असणारे बोअर चालू करून पाणी मारत आग विझवली. जीवितहानी न झाल्याने स्थानिक लोकांनी आणि बघ्यांनी सुटकेचा निःश्वास टाकला. पोलिसांना ही घटना अवगत होताच पोलिसांनी घटनास्थळी धाव घेत जळलेल्या गाडीचा पंचनामा केला.
