शिवसेना उबाठा गटाचे जिल्हा संपर्क प्रमुख शेखर गोरे यांची माहिती
दहिवडी : ता.३०
महाविकास आघाडीच्या माढा लोकसभा मतदारसंघाचे उमेदवार असलेले धैर्यशील मोहिते पाटील यांच्या प्रचाराची पुन्हा एकदा दहिवडीमध्ये मोठी सभा होणार असल्याची माहिती शिवसेना उद्धव बाळासाहेब ठाकरे गटाचे जिल्हा संपर्कप्रमुख शेखर गोरे यांनी दिली. या सभेसाठी खुद्द शरद पवार आणि शिवसेना नेत्या सुषमा अंधारे या उपस्थित राहणार असल्याची माहिती शेखर गोरे यांनी दिली.
धैर्यशील मोहिते पाटील यांच्या प्रचारार्थ गोंदवले जिल्हा परिषद गटातील गोंदवले खुर्द या गावात त्यांनी कोपरा सभा घेतली. यादरम्यान उपस्थित पत्रकारांनी त्यांना दहिवडी येथे झालेल्या सभेच्या गैरहजेरीबाबत छेडले असता त्यांनी पत्रकारांना माहिती दिली. यावेळी त्यांनी येत्या दोन दिवसात दहिवडी मध्ये शरद पवार आणि सुषमा अंधारे यांची मोठी जाहीर सभा घेणार असल्याची माहिती दिली. यावर दहिवडी मध्ये काही दिवसापूर्वी शरद पवार येऊन गेले त्यानंतर ते पुन्हा एकदा दहिवडीत येणार का? असा प्रश्न विचारला असता त्यांनी शंभर टक्के येणार… वेट अँड वॉच! असे सांगितले.
त्यामुळे शेखर गोरे यांनी माण खटाव विधानसभा मतदार संघातील आपली ताकद आणि वर्चस्व दाखवून आगामी विधानसभा लढवण्याच्या दृष्टीने एक पाऊल पुढे टाकल्याची चर्चा सर्वत्र रंगली आहे.
