महाराष्ट्र न्यूज प्रतिनिधी /खंडाळा
शिरवळ ता.खंडाळा गावच्या हद्दीमध्ये शिर्के पेपर मिळालगत महामार्ग ओलांडणाऱ्या पादचाऱ्याचा भरधाव कारने दिलेल्या धडकेत जागीच मृत्यू झाला आहे. यामध्ये नथुराम विष्णू समगीर (वय ५७,रा.समगीरवाडी ता.पुरंदर जि.पुणे )असे ठार झालेल्या पादचारीचे नाव आहे.
शिरवळ ता.खंडाळा गावच्या हद्दीमध्ये वीर,समगीरवाडी येथील नथुराम समगीर हे कामानिमित्त आले होते. दरम्यान, नथुराम समगीर हे शिर्के पेपर मिलजवळ महामार्ग ओलांडत असताना पुणे बाजूकडून सांगली बाजूकडे भरधाव वेगाने निघालेल्या रेंज रोव्हर कार (क्र.एमएच-१०-डीडी-१०१) ने नथुराम समगीर यांना जोरदार धडक दिली. हि धडक एवढी जोरदार होती कि नथुराम समगीर हे जागीच ठार झाले. यावेळी कारचालकाने घटनेनंतर घटनास्थळावरून पलायन केले. दरम्यान, नथुराम समगीर यांच्या मृतदेहाचे शवविच्छेदन शिरवळ येथील प्राथमिक आरोग्य केंद्रात करण्यात येऊन मृतदेह नातेवाईकांच्या ताब्यात देण्यात आला. यावेळी कारचालक संजय माने याला शिरवळ पोलीसांनी मोठ्या शिताफीने आनेवाडी टोलनाक्यावर जेरबंद करीत अटक केले असता न्यायालयाने न्यायालयीन कोठडी सुनावली आहे.
या घटनेची नोंद शिरवळ पोलीस स्टेशनला झाली असून अधिक तपास पोलीस उपनिरीक्षक सागर अरगडे हे करीत आहे.
