महाराष्ट्र्र न्यूज प्रतिनिधी :मुळगाव
कोयना पाणलोट क्षेत्रात पावसाचा जोर पूर्णपणे ओसरल्याने शिवाजी सागर जलाशयात येणाऱ्या पाण्याची आवकही मोठ्या प्रमाणात घटली आहे. धरणात केवळ 2 हजार 100 क्युसेक्स प्रतिसेकंद पाण्याची आवक होत असल्याने कोयना धरणाचे सहा वक्री दरवाजे सोमवार दि. 24 रोजी सकाळी 7 वाजून 35 मिनिटांनी बंद करण्यात आले आहेत. त्यामुळे केवळ धरणाच्या पायथा वीजगृहातून वीजनिर्मिती करून 2 हजार 100 क्युसेक्स प्रतिसेकंद पाण्याचा विसर्ग कोयना नदीपात्रात सुरू करण्यात आला आहे. तर 105.25 टीएमसी पाणीसाठवण क्षमता असणाऱ्या धरणात आजच्या घडीला 95.79 टीएमसी इतका पाणीसाठा झाला असल्याची माहिती धरण व्यवस्थापन सुत्रांनी दिली.
गेल्या चार दिवसांपूर्वी कोयना धरण पाणलोट क्षेत्रात पावसाचा जोर वाढल्याने शिवाजी सागर जलाशयात पाण्याची आवक तब्बल 61 हजार 361 क्युसेक्स प्रतिसेकंदपर्यंत गेली होती. त्यामुळे धरणाचे दरवाजे शुक्रवार दि. 21 रोजी दीड फुटाने व नंतर आवक वाढतच गेल्याने पाणीसाठ्यावर नियंत्रण राखण्यासाठी सायंकाळी 5.30 वाजता पुन्हा धरणाचे दरवाजे दीड फुटावरून 4 फुटाने उचलून कोयना नदीपात्रात 25 हजार 399 क्युसेक्स प्रतिसेकंद व धरणाच्या पायथा वीजगृहातून 2 हजार 100 असा एकूण 27 हजार 499 क्युसेक्स प्रतिसेकंद पाण्याचा विसर्ग कोयना नदीपात्रात सुरू करण्यात आला होता.
रविवारपासून कोयना पाणलोट क्षेत्रात पावसाने पूर्णपणे उघडीप घेतल्याने धरणात येणाऱ्या पाण्याची आवकही मोठ्या प्रमाणात कमी झालेली आहे. धरणात आजच्या घडीला फक्त 2 हजार 100 क्युसेक्स प्रतिसेकंद पाण्याची आवक सुरू आहे. तर धरणात 95.79 टीएमसी इतका पाणीसाठा झाला आहे. त्यामुळे कोयना धरणाचे सहा वक्री दरवाजे सोमवारी सकाळी 7 वाजून 35 मिनिटांनी बंद करण्याचा निर्णय धरण व्यवस्थापनाने घेतला आहे. त्यानुसार आता केवळ पायथा वीजगृह चालू असून त्यातून 2 हजार 100 क्युसेक्स पाण्याचा विसर्ग कोयना नदीपात्रात सुरू ठेवण्यात आला आहे. धरणात जेवढे पाणी येत आहे तेवढेच पाणी नदीपात्रात सोडून दिले जात आहे.
कोयना पाणलोट क्षेत्रात गेल्या चोवीस तासांपासून प्रतिसेकंद 2 हजार 100 क्यूसेक्स पाण्याची आवक सुरू असून सोमवारी सकाळी 8 वाजल्यापासून सायंकाळी 5 वाजेपर्यंत कोयनानगर येथे 28 (4011), नवजा येथे 12 (4582) मिलिमीटर आणि महाबळेश्वर येथे 8 (4430) मिलिमीटर इतक्या पावसाची नोंद होऊन धरणातील पाणीसाठा 95.79 टीएमसी इतका झाला आहे. तर पश्चिम घाटातील अतिपर्जन्यवृष्टी क्षेत्रातील प्रतापगड येथे 20 (3888), सोनाट 19 (3319), बामणोली 13 (2809), काठी 8 (2838) मिलीमीटर पावसाची नोंद झाली आहे. जलाशयातील पाणीपातळी 2156.02 फूट व 657.200 मीटर इतकी झाली आहे. सध्या धरणात 95.79 टीएमसी पाणीसाठा झाला असून उपयुक्त पाणीसाठा 90.67 टीएमसी आहे. कोयना धरण 91.02 टक्के भरले आहे. दरम्यान, कोयना धरणाच्या गेटमधून पाण्याचा विसर्ग बंद करण्यात आल्याने कोयना, केरा, काजळी, काफना नद्यांसह इतर नद्यांच्या पाणीपातळीत मोठी घट झाली असून कोयना नदीवरील सर्व पूल पाण्याबाहेर आल्याने ते वाहतुकीस पूर्ववत खुले झाले आहेत
