महाराष्ट्र न्यूज कराड प्रतिनिधी :
गमेवाडी (ता. कराड) गावच्या हद्दीत मंगळवारी एका उसाच्या शेतात मृत बिबट्या आढळून आला आहे. मागील महिनाभरात मृत बिबट्या सापडण्याची ही दुसरी घटना आहे. गमेवाडी परिसरात बिबट्याचा वावर असल्याचे निदर्शनास येत आहे. त्यामुळे परिसरातील नागरिकांमध्ये भीतिचे वातावरण निर्माण झाले आहे.
गमेवाडी येथे तळीचा मळा नावाच्या शिवारात हनणमंत चंद्रु जाधव यांच्या शेतात कारखान्यांच्या मजुरांकडून ऊस तोडणी चे काम सुरू आहे. शेजारील शेतात असणाऱ्या उसामुळे अडचण होऊ नये यासाठी हणमंत जाधव हे चंद्रकांत गोविंद जाधव यांच्या शेतातील ऊस एका बाजूला दाबत असताना शेताच्या मध्यभागी बिबट्या त्यांना पाहावयास मिळाला त्यामुळे हणमंत जाधव यांना क्षणभर काहीच सुचले नाही. ते घाबरून गेले.
मात्र बिबट्याची काहीच हालचाल होत नसल्याचे जाधव यांना लक्षात येताच, त्यांनी पुढे जाऊन पाहिले असता बिबट्या मृत अवस्थेत असल्याचे त्यांना आढळून आले. त्यांनी तातडीने वनविभाग तसेच पोलीस पाटील यांना फोनद्वारे माहिती कळवली. वन खात्याचे अधिकारी, पोलीस पाटील तातडीने घटनास्थळी पोहोचले, त्यांनी बिबट्याला ताब्यात घेऊन पुढील कार्यवाही केली.
