महाराष्ट्र न्यूज नेटवर्क
सातारा, दि. १० जानेवारी : नव्या संचालक मंडळाची पहिलीच बैठक पंचतारांकित हॉटेलात आयोजीत केल्याने सातारा जिल्हा मध्यवर्ती बँकेच्या संचालक मंडळावर टीकेचा भडीमार होत आहे.
शह-काटशह आणि आरोप-प्रत्यारोपांनी गाजलेली सातारा जिल्हा बँकेची निवडणूक पार पडल्यानंतर नव्यानं निवडून आलेल्या संचालक मंडळाला पहिल्याच निर्णयामुळं टीकेचा सामना करावा लागत आहे. संचालक मंडळाच्या पहिल्या बैठकीची जागा यासाठी कारण ठरली आहे. ही बैठक ‘ला मेरिडीअन’ या पंचतारांकित हॉटेलात घेतली गेल्यामुळं संचालक मंडळावर टीकेची झोड उठली आहे.
नव्या प्रतिनिधींना कामकाजाची माहिती व्हावी, यासाठी कार्यशाळा घेण्याची पद्धत असते. सर्वच स्तरांवर अशा कार्यशाळा घेतल्या जातात. जिल्हा बँकांवर निवडून येणारे प्रतिनिधी देखील त्यास अपवाद नाहीत. काही संचालकांनी दिलेल्या माहितीनुसार, नाबार्डच्या नियमांनुसार नव्याने निवडून आलेल्या संचालक मंडळाची कार्यशाळा एक महिन्याच्या आत घेणं बंधनकारक आहे. त्यानुसार ही कार्यशाळा घेतली गेली. या कार्यशाळेत संचालकांना कर्तव्ये, जबाबदाऱ्या व सहकार क्षेत्राच्या पुढील आव्हानांची माहिती दिली जाते. राज्य बँकेचे अध्यक्ष, सहकार आयुक्त, आणि नाबार्डचे सीजीएम यांनी या बैठकीत संचालकांना मार्गदर्शन केलं. यावेळी बँकेचा अधिकारी वर्ग सुद्धा उपस्थित होता. या कार्यशाळेला शिवेंद्रराजे भोसले, ज्ञानदेव रांजणे, शेखर गोरे आणि उदयनराजे भोसले हे अनुपस्थित होते.
संचालकांनी बैठकीचे समर्थन केले असले तरी बैठकीच्या जागेवरून विरोधकांनी जोरदार टीका केली आहे. भाजपचे आमदार आणि जिल्हा बँकेचे माजी संचालक जयकुमार गोरे यांनी संचालक मंडळावर टीका केली. ‘या कार्यशाळेत संचालकांनी नक्की काय खाल्लं आणि ते का प्यायले याची सुद्धा माहिती घ्यावी लागेल. मी संचालक असताना हाॅटेलमध्ये बैठका झाल्या होत्या. मात्र, एवढ्या मोठ्या हाॅटेलात झाल्या नव्हत्या. शिवाय, मी अशा बैठकांना जात नव्हतो, असं ते म्हणाले.
गृह राज्यमंत्री शभुराज देसाई यांनी देखील कार्यशाळेवर आक्षेप घेत संचालकांना खडे बोल सुनावले आहेत. ‘कार्यशाळा घ्यायचीच होती तर ती शेतकऱ्यांच्या बांधावर सुद्धा घेता आली असती. मात्र असं न करता थोडा विरंगुळा म्हणून थंड हवेच्या ठिकाणी ही कार्यशाळा घेतली गेली हे आक्षेपार्ह आहे,’ असं ते म्हणाले.
![सातारा जिल्हा बँकेच्या संचालकांची कार्यशाळा फाइव्ह स्टार हॉटेलात; चर्चा तर होणारच!](https://i0.wp.com/mahanewsnet.com/wp-content/uploads/2022/01/FB_IMG_1641833182186.jpg?fit=1080%2C608&ssl=1)