मसूर : मसूर कोरेगांव रस्त्यावर मसूर पासून म्हणजेच कोरेगांव फाटा ते थोरोबा डोंगरपर्यंतच्या रस्त्याची अक्षरशा चाळण झाली असून मोठ-मोठ्या खड्यांने वाहनधारक त्रस्त झाले आहेत. या रस्त्यावरून ये-जा करताना दुचाकीसह वाहनांचा खुळखुळा होत आहे. तर धोकादायक खड्डे जीवघेणे ठरू लागले आहेत. दरम्यान हेळगाव ते तारगाव फाटा रस्त्याचे कामही गेल्या तीन वर्षापासून रखडले आहे. काही ठिकाणी खडीकरण केले आहे, डांबरीकरणाचे काम बाकी आहे. तर काही ठिकाणी साईट पट्ट्या भरून घेतल्या आहेत.तसेच डांबरीकरण करण्याअगोदरच साईट पट्ट्या भरुन घेतल्याने वाहनधारकामधून आश्चर्य व्यक्त होत आहे.
कोरेगाव फाटा ते थोरोबा डोंगरापर्यंत
साधारणता तीन किलोमीटर रस्त्यावर ठिकठिकाणी मोठ-मोठे खड्डे पडले आहेत. सध्या पावसाळा सुरु असल्याने पावसाचे पाणी साचून राहिल्याने दिवसेंदिवस खड्डे मोठे होऊ लागले आहेत. या मोठ्या खड्ड्यात दुचाकी आपटून पडण्याच्या घटना अनेकदा घडत आहेत उखडलेल्या रस्त्यावरून येजा करताना चारचाकी वाहनांचा, दुचाकी वहानांचा अक्षरशः खुळखुळा होत आहे तर अनेकांना मणक्याचे आजार जडले आहेत त्यामुळे या मार्गावरुन प्रवास करणारे प्रवाशी जिव मुठीत घेवून प्रवास करत आहेत. संबंधीतांनी पहाणी करुन या रस्त्याचे काम लवकर सुरु करावे अशी मागणी या मार्गावरुन प्रवास करणाऱ्या प्रवाशांनी लोकमतशी बोलताना व्यक्त् केली.
या तीन किलोमीटर अंतरातील रस्त्यावर खड्ड्यांचे साम्राज्य पसरले आहे. खड्डे चुकवितना वाहनधारकांना मोठी कसरत करावी लागत आहे. या रस्त्याची दुरुस्ती व्हावी अशी मागणी वारंवार वाहनधारक व परिसरातील नागरिकांमधून होत असताना संबंधित अधिकारी याकडे जाणीवपूर्वक दुर्लक्ष करत आहेत. रस्त्याचे काम झाले नसल्याने या रस्त्यावरून प्रवास करणाऱ्या प्रवाशांची हाडे खिळखिळी होऊ लागली आहेत.
या रस्त्याची गेल्या तीन चार महिन्यापूर्वी या रस्त्याची केवळ नावापुरतीच डागडुजी करण्यात आली होती. मात्र सध्या पावसाळा सुरू झाल्यामुळे हा रस्ता पुन्हा एकदा खड्डेमय झाला आहे. हेळगाव मसूर हा नेहमीच वर्दळीचा रस्ता असून या रस्त्याचे काम तातडीने करावे अशी मागणी या परिसरातील नागरिक व वाहनधारकांकडून केली जात आहे.
या रस्त्यासंबंधी खासदार श्रीनिवास पाटील यांनी पत्रव्यवहार करुन रस्ता खडीकरण व डांबरीकरण करण्याच्या सुचना संबंधीत बांधकाम खात्याकडे केल्या होत्या. सार्वजनीक बांधकाम विभागाचे अधिक्षक वेदपाठक यांनी सदर रस्त्याचे डांबरीकरण विशेष दुरुस्ती योजनेअंतर्गत डिसेंबर 2020 अखेर पूर्ण करणार असल्याचे पत्र खासदार श्रीनिवास पाटील यांना दिले होते त्यामुळे ग्रामस्थांच्यात आनंदाचे वातावरण होते.परंतु खासदार श्रीनिवास पाटील यांना पत्र पाठवून दिलेले अश्वासनही सार्वजनिक बांधकाम खात्याच्या अधिकाऱ्यांनी पुर्ण केले नसल्याने या मार्गावरुन प्रवास करणाऱ्या प्रवाशांच्यात संतापाची लाट निर्माण झाली आहे.
रस्त्यावर ठिकठिकाणी पडलेल्या खड्ड्यांमुळे खड्ड्यातील दगड-माती रस्त्यावर पसरत आहे या रस्त्यावरून ये-जा करताना रस्त्यावर आलेल्या दगड मातीमुळे वाहने विशेषत: दुचाकी गाड्या घसरत आहेत. त्यामुळे अपघाताला निमंत्रण दिले जात आहे त्यामुळे या रस्त्याची तातडीने दुरुस्त करावी व ग्रामस्थांना दिलासा दयावा.
कोरेगांव रस्त्यांवर कराड कोरेगांव एस.टी.दिवसभर धावत असते मसूरहून कोरेगांव कडे जाणाऱ्या रस्त्याच्या खडडयातून एस.टी.धावत असताना मोबाईलमध्ये गुंग असलेल्या प्रवाशालाही कुणीही न सांगता एस.टी.कुठे आली याची जाणीव होते. तर एस.टी.खडडयात आपटत असल्याने एस.टी.च्या इंजिनच्या आवाजापेक्षा बाकीचाच आवाज जास्त् येतो.तर या मार्गावर एस.टी.त बसलेल्या प्रवाशांना एखादया पाळण्यात बसल्यासारखे वाटते.